Çiliniň aňrybaş ulagy – superkary «Hot Wheels» kolleksiýasynyň täze modeli bolar

«Hot Wheels» kolleksiýa ulaglarynyň meşhur öndürijisi «Mattel» kompaniýasy Hot Wheels Legends Tour abraýly bäsleşiginiň ýeňijisini yglan etdi. 2024-nji ýylda baş baýrak Çiliniň «La Liebre» atly aýratyn ýaryş awtoulagyna mynasyp görüldi. Ýokary galdyrylyp açylýan gapylary we ullakan ganat örtügi bilen tapawutlanýan bu ajaýyp sport ulagy 1:64 möçberdäki kiçi model görnüşinde ebedileşdiriler we halkara bazaryna satuwa çykarylar – diýip, auto.ru saýty habar berýär. «La Liebre» modeliniň döredilmegi öz ýurdunda awtoulag medeniýetini işjeň ösdürýän «Cars and Coffee Chile» täjirçilik däl guramasy tarapyndan ýakyndan goldanyp, amala aşyryldy. Taslamanyň inženerleri ulagy düýbünden gaýtadan işlenen «Ford Falcon» platformasynda gurup, oňa aýratyn aýna-plastikden ýasalan kuzow oturdypdyrlar. Superkara 600 at güýjüni öndürýän 5,7 litr göwrümli kuwwatly «Chevrolet» kompaniýasynyň hereketlendirijisi oturdylandyr. Ulagyň hereketlendirijisi bäş tizlikli mehaniki transmissiýa bilen utgaşykly işleýär. Oýlanyşykly konstruksiýanyň işlenip düzülmeginiň netijesinde ulag bary-ýogy 900 kilogram agrama eýe boldy.