Gazagystan maý aýynda Russiýa bilen serhetdäki ýene dört geçelgede elektron nobat ulgamyny işe girizýär

Gazagystan döwlet serhetlerindäki geçelge nokatlarynda «CarGoRuqsat» elektron nobat ulgamyny giň möçberde ornaşdyrmagyny dowam etdirýär. Öňümizdäki aýlarda eýýäm Russiýa bilen 24 geçelgede işleýän elektron platforma ýene-de dört sany möhüm serhet geçelgesi birikdiriler. Bu barada Döwlet girdejileri baradaky komitetiň maglumatlaryna salgylanyp, «Sputnik Kazahstan» neşiri habar berýär. Şeýlelikde, 2025-nji ýylyň maý aýynda bu ulgam Demirgazyk-Gazagystan oblastyndaky «Žana žol», Kostanaý oblastyndaky «Kaýrak», Günbatar-Gazagystan oblastyndaky «Syrym» we Aktýubinsk oblastyndaky «Žaýsan» geçelge nokatlarynda işe başlar. Şol bir wagtyň özünde, häkimiýetler bu tejribäni Gyrgyzystan bilen serhet geçelgesinde ulanmaga taýýarlanýarlar, ol ýerde elektron nobatlar ýylyň dowamynda tapgyrlaýyn ornaşdyrylar. Häzirki wagtda «CarGoRuqsat» diňe bir Gazagystan-Russiýa serhedinde däl, eýsem Hytaý, Özbegistan we Türkmenistan bilen serhet geçelgelerinde hem hereket edýär. Bu ulgam ýük daşaýjylara programma ulgamy ýa-da Qoldau.kz platformasy arkaly serhedi geçmek üçin öňünden wagt bellemäge mümkinçilik berýär, bu bolsa durma wagtyny azaldýar we korrupsiýa töwekgelçiliklerini iň az çäge ýetirýär.