BMG-niň Baş sekretary Türkmenistanyň işläp taýýarlan Konsepsiýasyny makullady

Ozal habar berşimiz ýaly, türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow bilen Birleşen Milletler Guramasynyň Baş sekretary Antoniu Guterrişiň arasynda telefon arkaly söhbetdeşlik boldy. Söhbetdeşligiň barşynda bellenilişi ýaly, Türkmenistanyň Halkara parahatçylyk we ynanyşmak ýylynyň dowamyndaky işleriniň we onuň ileri tutýan ugurlarynyň Konsepsiýasy taýýarlandy. Bu resminamada Türkmenistanyň häzirki zaman ählumumy gün tertibiniň esasy meselelerine garaýyşlary beýan edilýär. Şeýle hem özara ynanyşmak, dialog we jogapkärçilik esasynda döwletleriň tagallalaryny birleşdirmek barada Türkmenistanyň garaýyşlary öz beýanyny tapýar. Türkmen halkynyň Milli Lideri bu babatda 2025-nji ýylyň özgerişler ýyly bolup biljekdigini hem-de bolmalydygyny nygtap, Türkmenistanyň agzalan Konsepsiýada beýan edilen maksatlaryny BMG-niň goldajakdygyna ynam bildirdi. Şeýle-de bu Konsepsiýa taýýarlanylanda BMG-niň başlangyjy boýunça geçen ýylyň sentýabrynda geçirilen "Geljegiň sammitiniň" esasy mazmunyna köp babatda esaslanylandygy aýratyn bellenildi. Birleşen Milletler Guramasynyň Baş sekretary Antoniu Guterriş ählumumy gün tertibiniň möhüm meseleleriniň çözülmegine gönükdirilen Konsepsiýanyň wajypdygyny belläp, ony dolulygyna makullaýandygyny aýtdy. "Watan" habarlar gepleşiginde beýan edilişi ýaly, türkmen halkynyň Milli Lideri telefon arkaly söhbetdeşligiň barşynda öňde durýan işleriň esasy ugurlary barada aýdyp, howpsuzlyk bilen bagly meselä ünsi çekdi hem-de Türkmenistanyň BMG-niň howandarlygynda Ählumumy howpsuzlygyň strategiýasyny işläp taýýarlamak baradaky başlangyjyny belledi.