Daniýa 2025-nji ýylyň başyndan ýük ulaglaryna ýollardan geçenligi üçin töleg tölemegi girizip başlar

Indiki ýyldan başlap Daniýa «Ýewrowinýetka» elektron ulgamyndan ýüz öwrüp, täze ýol salgydyna geçmegi meýilleşdirýär. Bu barada «Lardi.Today» saýty Şwesiýanyň ulag pudagynyň söwda we iş beriji guramasy bolan «Transportföretagen» portalynda çap edilen maglumata salgylanyp, habar berdi. 2025-nji ýylyň 1-nji ýanwaryndan Daniýa «Ýewrowinýetka» elektron ulgamy boýunça ylalaşygyndan çykyp, ýük ulaglar üçin täze ýol tölegini girizip başlar. Töleg milli ýol ulgamynyň köp böleginde 12 tonnadan ýokary ýük ulaglaryndan alnar. Tölegiň möçberi ýük ulagynyň CO2 zyňyndy synpyna, onuň agramyna we ekologik zolagyna bagly bolar. Eger ýük ulagy Daniýanyň ekologik zolaklarynyň birinde hereket edýän bolsa, üstaşyr geçmek üçin tölemeli ýygym has gymmat bolar. Geljek ýylyň 1-nji ýanwaryndan başlap, ýol tölegi döwlet ýollarynyň köp bölegine we munisipal ýollaryň bir bölegine (takmynan 10 900 km) degişli bolar, ýöne ýene birnäçe ýyldan Daniýanyň ähli ýollary üçin salgyt salmaklyk meýilleşdirilýär. Ýol salgydynyň möçberi ulagyň howa goýberýän CO2 zyňyndy synpyna bagly bolar. 12 tonnadan 17,99 tonna çenli agyr ýük ulaglary, eger ulag iň pes CO2 zyňyndy synpyna (1-nji synp) degişli bolsa, her kilometr üçin 0,86 daniýa krony (0,12 ýewro), we iň ýokary CO2 zyňyndy synpynda (5-nji synp) 0,13 daniýa krony (0,017 ýewro) tölemeli bolar. Emma Daniýanyň parlamenti CO2 zyňyndylarynyň derejeleri barada heniz doly çözgüt kabul etmändir. «Transportföretagen» neşiriniň berýän maglumatyna görä, Folketingde - ýurduň parlamentinde bu mesele boýunça 28-nji noýabrda ses bermeklige garaşylýar we assosiasiýanyň çeşmeleriniň habar berşine görä, onuň kabul ediljekdigi çaklanylýar. Ýük ulaglarynyň Daniýada CO2 zyňyndy synplary diýlip atlandyrylýan zyňyndy synplaryna bölünmegi Ýewropa Birleşigi tarapyndan bildirilýän talapdyr. Ähli ýük ulaglary kömürturşy gazynyň zyňyndylarynyň bäş CO2 zyňyndy synpyna degişli edilip bölünmelidir. CO2 zyňyndy synpy ýük ulagynyň kömürturşy gazynyň zyňyndylarynyň möçberine we ulagyň degişli topary üçin bellenen maglumat ähmiýetine görä kesgitlenýär. Şwesiýanyň ýük ulaglary hem aşakdaky CO2 zyňyndy synplaryna bölünýär: - 1-nji synp - 2019-njy ýylyň 1-nji ýanwaryna çenli ilkinji gezek bellige alnan ýa-da beýleki synplaryň hiç birine degişli bolmadyk ýük ulaglary; - 2-nji synp - CO2 barlag görkezijilerinden 5% pes zyňyndy derejesi bolan ýük ulaglary; - 3-nji synp - CO2 barlag görkezijilerinden 8% pes zyňyndy derejesi bolan ýük ulaglary; - 4-nji synp - CO2 barlag görkezijilerinden 50% pes zyňyndy derejesi bolan pes zyňyndyly ýük ulaglary; - 5-nji synp - nol zyňyndy derejesi bolan ýük ulaglary, mysal üçin, elektrik hereketlendirijili ýük ulaglary. Daniýanyň ýol salgydy, eger ýük ulaglary Daniýa ýük daşaýan ýa-da onuň çäginden üstaşyr geçýän bolsa, daşary ýurt ýük ulaglaryna hem degişlidir. Şonuň üçin daşaýjylar öz ulaglarynyň zyňyndy synpyny bilmekleri juda möhümdir.