
8/25/2025
100
Türkmenistanyň ilçisi Özbegistanyň saglygy goraýyş ministri bilen duşuşdy
22-nji awgustda Türkmenistanyň Özbegistan Respublikasyndaky Adatdan daşary we Doly ygtyýarly ilçisi Ş.Meredow Özbegistan Respublikasynyň saglygy goraýyş ministri A.Hudaýarow bilen duşuşdy. Türkmenistanyň DIM-niň resmi saýtynda berilýän habara görä, duşuşykda ikitaraplaýyn hyzmatdaşlygyň esasy meseleleri, hususan-da saglygy goraýyş, farmasewtika, lukmançylyk bilimi we ýurtlaryň arasynda tejribe alyşmak ýaly meseleler ara alnyp maslahatlaşyldy. Ilçi Ş.Meredow «Saglyk» Döwlet maksatnamasyny durmuşa geçirmegiň çäklerinde Arkadag şäherinde dürli lukmançylyk önümlerini öndürmek ugrunda ylmy işleri alyp barmaga we öndürmäge gönükdirilen iri lukmançylyk klasterini döretmek boýunça işleriň üstünlikli alnyp barylýandygyny belledi. Şeýle hem «Arkadag Medisina Klasteri Menejment» kärhanasynyň işi we kärhana tarapyndan öndürilýän halkara hil standartlaryna laýyk gelýän gündelik talap edilýän lukmançylyk önümleriniň dürli görnüşleri bilen tanyşdyryldy.