«Ýolagçy» goşundysynyň offlaýn we täze funksiýaly täzelenmesi işe girizildi

Jemgyýetçilik ulaglarynyň gatnaw ugurlaryny yzarlamaga niýetlenen «Ýolagçy» mobil goşundysy indi Aşgabat we Arkadag şäherlerinde ulanyjylaryň mümkinçiliklerini has-da giňeldýän möhüm täzelenmä eýe boldy. Esasy täzelik gatnaw ugurlarynyň offlaýn elýeterli bolmagydyr. Indi paýtagtyň we Arkadag şäheriniň ýaşaýjylary hem-de myhmanlary awtobuslaryň gatnawlaryny we öz saýlan ugurlaryny internete birikmezden görüp bilerler. Bu, esasanam, mobil trafigi çäkli ýa-da tor gurşawy pes ýerlerde bolan ulanyjylar üçin zerurdyr. Işläp düzüjiler şeýle hem interfeýsi şahsylaşdyrma funksiýasyny goşdular — munda ulanyjylar indi goşundydaky nyşanlaryň görnüşini we reňkini isleglerine görä düzüp bilerler. Munuň özi interfeýsi her bir ulanyjy üçin has amatly we özüne çekiji etmäge ýardam berýär. Mobil goşundynyň dizaýnyna hem möhüm üýtgeşmeler girizildi. Görmek arkaly kabul edişi has gowulandyrmak we ulanmagy has oňaýly etmek üçin birnäçe möhüm sahypalar düýpgöter täzeden düzüldi. Täze interfeýs has intuitiw we döwrebap häsiýete eýe boldy. Ulanyjylary täzelikler bilen has ýeňil usulda habarly etmek maksady bilen, goşundyda ýörite habarlar sahypasy döredildi. Onda ulag gatnawlarynda bolup geçýän üýtgeşmeler we programmanyň täzelenmeleri barada möhüm bildirişler ýerleşdirilýär. Bu ýolagçylara tertipnamalarda we gatnaw ugurlarynda bolup geçýän ähli täzelikler barada dessin habarly bolmaga kömek eder. Programma girizilen ýene bir peýdaly täzelik kartadaky kompas bolup, ol ulanyjylara goşundynyň nawigasiýa funksiýalaryny ulanan mahaly giňişligi has gowy görmäge mümkinçilik berýär. Täzelenme ýükläp almak üçin eýýäm Google Play internet dükanynda we yolagcy.turkmenportal.com web saýtynda elýeterlidir.